NULIS CERKAK BANYUMASAN NGGO NGURI-NGURI BASA PENGINYONGAN

NULIS CERKAK BANYUMASAN NGGO NGURI-NGURI BASA PENGINYONGAN

Daning  Agustav Triono

Budaya kuwe ora mung seni. Basa lan sastra uga budaya. Neng masrakat, sastra ora mung dewujudna nganggo tulisan. Neng masrakat ana sastra lisan lan sastra tulis. Sastra lisan neng Banyumas contone parikan, crita rakyat, babad, dongeng lan jemblung. Banjur sastra tulis yakuwe geguritan lan cerkak.

Apa iya sastra bisa nggo nguri-nguri budaya Banyumasan?

Angger dewek nulis sastra Banyumasan paling ora ana rong perkara sing bisa kewujud nggo nguri-nguri budaya Banyumasan

Sing sepisan sekang basa. Angger nganggo basa Banyumasan, dewek bisa nguri-nguri basane biyung (bahasa ibu). Miturut para ahli basa Banyumasan kuwe basa jawa sing kuna. Neng basa Banyumas vokal a ya diwaca a, ora dadi o. Umpamane Apa ya di waca Apa ora diwaca Opo.

Sing kepindho sekang isine. Angger nulis geguritan utawa cerkak Banyumasan kuwe bisa crita takhayul, mitos, babad uga bisa crita babagan kasunyatan neng masrakat sing dekembangna. Angger nulis sekang kisah nyata aja apa anane tapi dekembangna utawa debumboni imajinasi ben dadi apik. Angger dewek crita isine kaya kuwe artine bisa nguri-nguri budaya sing ana neng masrakat liwat tulisan.

Nulis cerkak Banyumasan idene bisa sekang ngendi ora. Bisa crita babagan urip sedina-dina, pengalaman pribadi, keluwarga lan liya-liyane. Seneng maca, maca buku lan maca alam dunya bisa ngrewangi nggo ngembangna ide.       

Tips nulis cerkak (sekang pirang-pirang sumber):

1.      Paragraf pembuka sing bisa marekna sing maca penasaran kepengin ngerti crita seteruse.

2.      Nggerakna tokoh, sifat lan karakter tokoh bisa dejelasna liwat lakune lan omongane.

3.      Fokus crita, ana konflik/masalah sing decritakna. Aja ngasih critane ora fokus.

4.      Ending. Penutup crita degawe sing marekna pembaca dadi terkesan.

5.      Kalimat efektif. Nganggo kalimat sing cindek ben kepenak dewaca.

6.      Judul/irah-irahan. aja kedawan,judul kuwe wakili isi.

7.      Editing.

8.      Sedurunge depublikasikna dewaca maning. Dediskusikna maring wong sing lewih ngerti utawa karo kanca batir.

Sing pungkasan ya kuwe mayuh bareng-bareng terus njajal nulis, nulis lan nulis. Merga sinau ora ana mandege. Inyong ya lagi sinau. Maturnuwun...

Klilan.....